HALMASHAURI YA WILAYA YA SONGEA YAPOKEA WATUMISHI 48 WAPYA

Tarehe ya Kuwekwa: January 26th, 2026

Halmashauri ya Wilaya ya Songea imepokea jumla ya watumishi 48 wapya waliopangiwa kufanya kazi katika idara mbalimbali, hatua inayolenga kuimarisha utoaji wa huduma kwa wananchi na kuongeza ufanisi katika utekelezaji wa majukumu ya Serikali.

Akizungumza kuhusu mgao huo, Mkurugenzi Mtendaji wa Halmashauri ya Wilaya ya Songea, Bi. Elizabeth Gumbo, amemshukuru Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania, kwa kuendelea kuiwezesha Halmashauri hiyo kwa kuipatia watumishi kulingana na mahitaji halisi ya maeneo ya kazi.

Mgawanyo wa Watumishi Wapya kwa Idara

Kwa mujibu wa taarifa hiyo, watumishi hao wamepangwa katika idara zifuatazo:

Idara ya Kilimo, Mifugo na Uvuvi – Watumishi 4

Idara ya Ujenzi – Mtumishi 1

Idara ya Afya – Watumishi 23

Idara ya Elimu (Walimu) – Walimu 20

Watumishi hao wanatakiwa kuripoti katika vituo vyao vya kazi mara moja ili kuanza kutekeleza majukumu yao kwa kuzingatia maadili ya utumishi wa umma pamoja na miongozo ya Serikali.

Aidha, Bi. Elizabeth Gumbo amewakaribisha watumishi wote wapya kufanya kazi kwa bidii, uzalendo na uadilifu, akisisitiza kuwa Halmashauri ya Wilaya ya Songea ni eneo lenye fursa nyingi za kujifunza, kuhudumia jamii na kuchangia maendeleo ya wananchi.

Hatua hii inaonesha wazi dhamira ya Serikali ya Awamu ya Sita katika kuboresha huduma za afya, elimu, miundombinu, pamoja na kuimarisha sekta ya kilimo, mifugo na uvuvi kwa ustawi wa wananchi wa Wilaya ya Songea.